Peningastefnunefnd Seðlabanka Íslands hefur ákveðið að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 7,25%.
Allir nefndarmenn studdu þessa ákvörðun, að því er fram kemur í tilkynningu bankans.
„Verðbólga mælist nú 5,2% og hefur aukist á ný. Þótt hækkun verðlags í janúar megi að miklu leyti rekja til breyttrar gjaldtöku hins opinbera af nýjum bifreiðum eru verðhækkanir á tiltölulega breiðum grunni,“ segir þar.
Undirliggjandi verðbólguþrýstingur sé því áfram þrálátur þótt hægt hafi á efnahagsumsvifum og skýr merki séu um kólnun á vinnumarkaði.
„Samkvæmt nýbirtri spá Seðlabankans er spennan í þjóðarbúinu horfin, útlit fyrir tiltölulega hægan hagvöxt og að verðbólga hjaðni þegar líður á árið. Þrátt fyrir tímabundna aukningu verðbólgu í byrjun árs hafa verðbólguhorfur til lengri tíma lítið breyst.“
Óvissa er þó enn sögð mikil enda launahækkanir enn töluverðar og verðbólguvæntingar sem áfram mælast yfir markmiði.
„Frekari ákvarðanir um lækkun vaxta bankans eru háðar því að skýrar vísbendingar komi fram um að verðbólga sé að hjaðna í 2½% markmið bankans.“
Frekari greiningu bankans á efnahagshorfum og -umhverfi má lesa í nýjasta riti Peningamála, sem einnig kom út í dag.