Í nýrri þjóðhagsspá Íslandsbanka er gert ráð fyrir afar hægum hagvexti á þessu ári. Fram kemur að bakslag í ýmsum útflutningsgreinum ásamt áhrifum hárra raunvaxta á innlenda eftirspurn séu helstu skýringar þessa.
„Spáð er 0,6% hagvexti í ár og ekki þarf mikið út af að bregða svo vöxturinn snúist í samdrátt,“ segir í umfjöllun bankans.
Spáin geri þó ráð fyrir að hagvöxtur glæðist á ný á næstu tveimur árum, studdur af bata í útflutningsgreinum og minnkandi vaxtaaðhaldi.
„Fjárfesting tekur þá aftur við sér og vöxtur einkaneyslu verður þróttmeiri en í ár.“
Verðbólga er sögð verða þrálát áfram og yfir markmiði Seðlabankans.
„Lokaspretturinn að verðbólgumarkmiðinu mun reynast erfiður og ekki útlit fyrir að því verði náð á spátímanum að öðru óbreyttu.“
Spáin gerir ráð fyrir að Seðlabankinn haldi stýrivöxtum óbreyttum þar til verðbólga fari að hjaðna á ný.
„Líklegt er að vaxtalækkunarferlið hefjist á vordögum 2026 og varfærin vaxtalækkunarskref verði stigin fram á mitt ár 2027.“
Þá eru sagðar horfur á hægfara veikingu krónunnar á spátímanum, enda sé hátt raungengi áskorun fyrir útflutningsgeirann og búi til lækkunarþrýsting á gengið.
Alla spá greiningar Íslandsbanka má sækja á vef bankans.