Áfram virðist rólegt yfir íbúðamarkaði að mati greiningardeildar greiningardeildar Landsbankans. Þó er bent á misjafna stöðu kaupenda og seljenda á höfuðborgarsvæðinu eftir því hvort horft er til markaðar með nýjar eða eldri íbúðir.

Í reglubundinni umfjöllun í byrjun viku er bent á að raunverð íbúða hafi lækkað á milli ára í ágúst, í fyrsta skipti frá því í byrjun árs 2024, nafnverð íbúða hafi aðeins hækkað um 2,2 prósent á einu ári og að sífellt lengri tíma taki að selja íbúðir.

„Ein birtingarmynd lækkandi hitastigs á íbúðamarkaði er sífellt lengri sölutími íbúða,“ segir í umfjöllun greiningardeildarinnar.

Miðað sé við í mælingum á þeim tíma sem tekur að selja húsnæði að taki skemmri tíma en fjóra mánuði að selja þá sé markaðurinn á valdi seljenda. En ef það taki meira en sex mánuði þá þýði það að markaðurinn sé á valdi kaupenda.

Vitnað er í tölur Húsnæðis- og mannvirkjastofnunar um að „birgðatími“ nýrra íbúða á höfuðborgarsvæðinu hafi í ágúst verið tæplega 17 mánuðir. Það sé mun lengra en birgðatími eldri íbúða, sem hafi numið tæplega þremur mánuðum.

„Þannig má segja að markaður með nýjar íbúðir sé á valdi kaupenda en markaður með eldri íbúðir sé á valdi seljenda.“

Greiningardeild Landsbankans bendir líka á að vísitala leiguverðs hafi hækkað í ágúst og að hækkandi leiguverð hafi með tímanum áhrif á verðbólgumælingar.

Minnt er á að Hagstofan birti verðbólgutölur fyrir september á fimmtudag í þessari viku. Þá gerir greiningardeild Landsbankans ráð fyrir að verðbólga aukist úr 3,8 prósentum í 4,1 prósent.