Til stendur að Krónan opni í nýju verslunarhúsnæði að Hafnarbraut 60 á Höfn í Hornafirði á næsta ári. Í tilkynningu Krónunnar kemur fram að vonir standi til að hægt verði að opna verslunina, sem verður um 1.500 fermetrar að stærð, fyrir næsta sumar, annars í síðasta lagi um haustið.

Krónan segir markmiðið með nýrri verslun á Höfn að veita íbúum og gestum á svæðinu enn betri þjónustu og aðgengi að fjölbreyttu vöruúrvali á sem allra hagstæðasta verði.

„Þegar fram líða stundir verður einnig boðið upp á heimsendingaþjónustu innanbæjar og til nærliggjandi sveita,“ segir í tilkynningunni.

Haft er eftir Guðrúnu Aðalsteinsdóttur, framkvæmdastjóra Krónunnar, að fyrirtækið leggi sig fram um að tryggja að landsmenn njóti sama úrvals á sama verði, óháð búsetu, hvort sem það sé í gegnum Snjallverslun Krónunnar eða í hefðbundinni verslun.

Jafnframt segir Sigurjón Andrésson, bæjarstjóri Hornafjarðar, það vera mikið gleðiefni að fá Krónuna inn í samfélagið.

„Ný verslun eykur fjölbreytni og tryggir samkeppni á matvörumarkaði, sem skiptir miklu fyrir íbúa og gesti. Verslunin rís við íbúðabyggðina þar sem ekið er inn í bæinn og verður norðan við nýtt og glæsilegt 200 íbúða hverfi sem tekur á sig mynd á næstu árum. Þetta er til marks um mikla uppbyggingu um allan Hornafjörð, bæði í dreifbýlinu og í þéttbýlinu hér á Höfn – og þann mikla kraft sem samfélagið býr yfir,“ segir hann.

Fram kemur að í nýju versluninni verði lögð áhersla á ferskleika og góða upplifun viðskiptavina. Í boði verði að skanna og skunda í Krónuappinu og þá verði, auk hefðbundinnar þjónustu, boðið upp á lausnir fyrir fyrirtæki.

„Krónan leggur jafnframt mikið upp úr sjálfbærni og umhverfisvænum lausnum. Í nýju versluninni verður meðal annars orkusparandi LED lýsing, lokaðir kælar og frystar knúnir umhverfisvænu kerfi, og grænar innkaupakerrur úr endurunnu plasti sem safnað hefur verið úr sjónum.“