Hagstofan áætlar að landsframleiðsla hafi dregist saman um 1,9 prósent að raunvirði á öðrum ársfjórðungi 2025 miðað við sama tímabil 2024. Í birtingu stofnunarinnar á þjóðhagsreikningum á öðrum ársfjórðungi þessa árs segir að framlag utanríkisviðskipta vegi þyngst í samdrættinum, en aukinn halli á vöru- og þjónustuviðskiptum valdi því að framlag utanríkisviðskipta til hagvaxtar sé neikvætt um 5,8 prósent á öðrum ársfjórðungi.

„Aukin þjóðarútgjöld vega á móti samdrætti í utanríkisviðskiptum en fyrsta mat gerir ráð fyrir að fjármunamyndun hafi aukist um 8,3%, einkaneysla um 3,1% og samneysla um 0,3%, allt að raunvirði. Að teknu tilliti til birgðabreytinga er áætlað að þjóðarútgjöld á öðrum ársfjórðungi hafi aukist um 3,9% að raunvirði miðað við sama tímabil fyrra árs.“

„Einkaneysla á öðrum ársfjórðungi jókst um 3,1% að raunvirði miðað við sama tímabili fyrra árs. Innlend neysla jókst almennt þar sem vöxtur var í kaupum heimilanna á þjónustutengdum neysluvörum.“

Fram kemur að kaup heimilanna á bifreiðum hafi aukist annan árfjórðunginn í röð eftir samdráttarskeið síðustu misseri.

„Einnig var töluverður vöxtur í einkaneyslu vegna útgjalda Íslendinga á ferðalögum erlendis ásamt vægum vexti í húsnæðislið.“

Samneysla jókst um 0,3 prósent

Þá er samneysla hins opinbera talin hafa aukist um 0,3 prósent að raunvirði á öðrum ársfjórðungi miðað við sama tímabil í fyrra.

„Að nafnvirði er talið að samneyslan hafi aukist um 9,2% frá fyrra ári en á sama tíma er áætlað að verðbreyting hafi verið um 8,8% sem veldur 0,3% magnbreytingu.“

Fjármunamyndun jókst um 8,3 prósent

Fjármunamyndun er sögð talin hafa aukist um 8,3 prósent að raunvirði á öðrum ársfjórðungi 2025 samanborið við sama ársfjórðung fyrra árs. Þar af er talið að fjármunamyndun atvinnuveganna hafi aukist um 13,6 prósent að raunvirði og fjármunamyndun hins opinbera um 6,1 prósent, á meðan fjármunamyndun íbúðarhúsnæðis hafi dregist saman um 8,9 prósent á sama tímabili.

„Síðustu þrjá ársfjórðunga hefur fjármunamyndun atvinnuveganna aukist talsvert vegna umtalsverðs innflutnings á tölvubúnaði fyrir gagnaver. Nokkur óvissa er sem fyrr um fjármunamyndun hins opinbera í niðurstöðum annars ársfjórðungs.“

Birgðabreytingar drógust saman um 11 milljarða

Þá hafi heildarverðmæti birgða lækkað um 10,9 milljarða króna á öðrum ársfjórðungi 2025 miðað við fyrsta ársfjórðung.

Mest vægi hafi neikvæð breyting í sjávarútvegi haft, en hún hafi numið 10,3 milljörðum króna. Þrátt fyrir það sé samdrátturinn minni en áður hafi sést á öðrum ársfjórðungi undangenginna ára.

Olíubirgðir eru sagðar hafa aukist um 321 milljón króna, en birgðir í áli, álafurðum og kísilmálmi dregist saman um 991 milljónir króna. Framlag birgðabreytinga til hagvaxtar á öðrum ársfjórðungi 2025 hafi verið 0,1 prósent.

4,1 prósent samdráttur vinnumagns milli ára

„Áætlað er að heildarfjöldi unninna stunda hafi dregist saman um 4,1% á öðrum ársfjórðungi 2025 samanborið við annan ársfjórðung 2024. Hér er rétt að setja fyrirvara um að þessi gögn eru ekki árstíðaleiðrétt og hafa páskar mikil áhrif á ársfjórðungslegar tölur. Páskar voru núna á öðrum ársfjórðungi en á fyrsta ársfjórðungi árið 2024.“

Hagstofan stefnir að því að birta árstíðaleiðréttar tölur um vinnumagn samhliða næstu birtingu þjóðhagsreikninga í lok nóvember.

Árstíðaleiðrétt landsframleiðsla dróst saman

Árstíðaleiðrétt landsframleiðsla dróst saman að raunvirði um 0,7 prósent á öðrum ársfjórðungi 2025 miðað við fyrsta ársfjórðung 2025, samkvæmt þjóðhagsreikningum Hagstofunnar.

„Einkaneysla jókst um 0,5% að árstíðaleiðréttum mælikvarða, samneysla dróst saman um 0,3%, og fjármunamyndun hækkaði um 3,9%. Á sama tímabili minnkaði árstíðaleiðréttur útflutningur um 3,0% en innflutningur jókst um 1,4%.“