Ný framkvæmdaáætlun um uppbyggingu hjúkrunarheimila á landsvísu gerir ráð fyrir mikilli fjölgun hjúkrunarrýma og viðsnúningi á biðlistum næstu árin. Inga Sæland, félags- og húsnæðismálaráðherra kynnti áætlunina í Ísafold, hjúkrunarheimili Hrafnistu í Garðabæ, í dag.

Við sama tækifæri undirrituðu ráðherra og Almar Guðmundsson, bæjarstjóri Garðabæjar, samning um nýtt hjúkrunarheimili við Vetrarmýri með allt að 100 hjúkrunarrýmum.

Fram kemur í tilkynningu ráðuneytisins að gert sé ráð fyrir að nýja hjúkrunarheimilið opni árið 2029.

Helstu punktar í nýrri framkvæmdaáætlun að mati ráðuneytisins:

• 1.507 hjúkrunarrými verða tekin í notkun fyrir lok árs 2030.
• Af þeim verða ný hjúkrunarrými alls 1.355 talsins.
• 90% af þeim hjúkrunarrýmum sem tekin verða í gagnið verða þannig hrein viðbót við hjúkrunarrýmin sem þegar eru til staðar út um landið.
• 10% eru endurbætur á eldri rýmum – samtals 152 hjúkrunarrými.

„Nýju rýmin skiptast þannig að á höfuðborgarsvæðinu er gert ráð fyrir 897 nýjum rýmum, 146 nýjum rýmum á Norðurlandi, 140 á Suðurnesjum, 72 á Suðurlandi, 60 á Vesturlandi, 20 á Vestfjörðum og 10 á Austurlandi.“

Tekið er fram að um afar metnaðarfull markmið sé að ræða og áformin ýmsu háð, svo sem skipulagshraða í sveitarfélögum, hraða í útboðsferlum og uppbyggingarhraða.

„Gangi áformin eftir er gert ráð fyrir að árin 2029 og 2030 verði staðan orðin þannig að tæplega 100 einstaklingar verði í svokölluðum biðrýmum þaðan sem þeir fara áfram á hjúkrunarheimili og að fjöldi þeirra sem eru á biðlista og ekki í biðrýmum verði kominn niður í núll.“

Haft er eftir Ingu Sæland, félags- og húsnæðismálaráðherra, að áætlunin sem hún hafi nú kynnt marki þáttaskil í þjóðarátaki ríkisstjórnarinnar í uppbyggingu hjúkrunarrýma.

„Ég hef lagt hug og hjarta í það að tryggja að fullorðna fólkið okkar fái notið allrar þjónustu og alúðar á efsta æviskeiðinu. Markmiðið er skýrt: Enginn á að þurfa að vera á biðlista og í óöryggi án umhyggju og þeirrar þjónustu sem okkur er skylt að veita,“ segir ráðherra í tilkynningunni.