Mennta- og barnamálaráðuneytið hefur ákveðið að gera langtímasamning við Lýðskólann á Flateyri.
Í umfjöllun á vef ráðuneytisins segir að skólasókn hafi verið góð og námið við skólann gefið góða raun.
„Í Lýðskólanum á Flateyri fer fram mikilvægt starf til að valdefla nemendur og auka trú þeirra á eigin getu,“ segir Guðmundur Ingi Kristinsson, mennta- og barnamálaráðherra.
Fram kemur að Guðmundur Ingi hafi heimsótt skólann við skólasetningu í haust ásamt Höllu Tómasdóttur forseta Íslands.
„Skólinn eykur fjölbreytni í menntakerfinu og námsframboð með áherslu á verklegt og upplifunarnám. Samningurinn er gerður til þriggja ára,“ segir í umfjölluninni.
Bent er á að lög um lýðskóla hafi verið sett á Alþingi árið 2019 til að stuðla að starfrækslu lýðskóla á Íslandi.
Lýðskólar eru sagðir skólar sem hafi að markmiði að veita almenna menntun og uppfræðslu og undirbúa nemendur fyrir þátttöku í lýðræðissamfélagi.
„Lögin festu í sessi faglega umgjörð um starfsemi slíkra skóla hér á landi en fram að því hafði engin löggjöf gilt um þá.“
Lýðskólar eru fyrir nemendur 18 ára og eldri, en frekari upplýsingar um starfsemina og kennsluhætti má finna á vef Lýðskólans.