Á árinu 2023 greiddu heimili landsins 48,1 milljarð króna í umhverfisskatta, aðallega í formi vega- og orkuskatta.
Í nýrri samantekt Hagstofu Íslands kemur fram að þetta ár hafi ríkið innheimt rúma 88 milljarða króna í umhverfis- og auðlindaskatta. Hlutdeild heimilanna í því nemi 54,7 prósentum.
„Þessir skattar skiptust í skatta á orku (39,7%), vega- og samgönguskatta (29,2%), mengunarskatt (18,7%), auðlindaskatt (0,38%), innheimtu í gegnum losunarheimildir í ETS-kerfinu (4,3%) og aðra kolefnistengda skatta (7,7%),“ segir í umfjöllun Hagstofunnar.
Þá segir Hagstofan að veiðigjöld á útgerðarfyrirtæki teljist samkvæmt skilgreiningu hagreikninga ekki umhverfisskattur.
„Veiðigjöldin sem innheimt voru árið 2023 námu rúmlega 10,1 milljarði króna samkvæmt ríkisreikningi.“