Hlaðvarpið Komið gott hefur fengið lokafrest til næstu mánaðamóta til að skrá sig sem fjölmiðil, að viðlagðri allt að 10 milljóna króna sekt — sem Rósa segir dæmi um að ríkið kæfi sköpunarkraft og einkaframtak einstaklinga.

„Ríkið er áfram upptekið af því að kveða niður sköpunarkraft einstaklinga og drepa einkaframtak,“ sagði Rósa og spurði: „Er ekki, virðulegur forseti, komið gott af því?“ sagði Rósa Guðbjartsdóttir, þingmaður Sjálfstæðisflokksins, í umræðum um fundarstjórn forseta á Alþingi í gær.

Rósa sagði að leggja ætti niður Fjölmiðlanefnd og færa verkefni hennar annað, eftir að stjórnendur hlaðvarpsins Komið gott fengu lokafrest til að skrá hlaðvarpið sem fjölmiðil, að viðlagðri allt að 10 milljóna króna stjórnvaldssekt fáist skráningin ekki fram.

Í ræðu sinni sagði Rósa að um sjálfstæða stjórnsýslunefnd væri að ræða sem heyrir undir menningar-, nýsköpunar- og háskólaráðuneytið og kostar skattgreiðendur rúmlega 100 milljónir króna á ári. Hún kvaðst hafa tekið sambærilegt mál upp áður í þingsal og sagðist þeirrar skoðunar að leggja ætti nefndina niður.

Afskipti ríkisvaldsins

„Af hverju er ríkisvaldið að skipta sér af hlaðvörpum sem einstaklingar halda úti?“ spurði Rósa og benti á að stjórnendur hlaðvarpsins Komið gott, tvær vinkonur sem hún sagði hafa „búið til skemmtiþátt úr engu“, stæðu nú frammi fyrir íþyngjandi skilyrðum af hálfu ríkisins.

Fjölmiðlanefnd vill, að sögn Rósu, flokka spjall vinkvennanna sem fjölmiðil þar sem í hlaðvarpinu sé val á umfjöllunarefni stjórnað og valið, auk þess sem fjárhagslegur ávinningur virðist vera af miðlun þess.

Rósa benti jafnframt á að Logi Einarsson, menningar-, nýsköpunar- og háskólaráðherra, hefði lýst því yfir í sumar að vinna væri hafin við að breyta lögum þannig að hlaðvörp yrðu ekki lengur skráningarskyld sem fjölmiðlar. Engu að síður héldi Fjölmiðlanefnd áfram að þrýsta á stjórnendur hlaðvarpa og hafi nú gefið hlaðvarpinu Komið gott lokafrest til næstu mánaðamóta til skráningar.