Fornminjasjóður hefur úthlutað styrkjum fyrir árið 2026 að upphæð 93,7 milljónir króna til 29 verkefna.
Fram kemur á vef Minjastofnunar að alls hafi borist 83 umsóknir í sjóðinn og alls sótt um 337.412.125 krónur.
Tæp 40 prósent heildarstyrkupphæðarinnar, 37,4 milljónir króna, renna til Fornleifastofnunar Íslands vegna níu verkefna á hennar vegum, en þar á eftir kemur Byggðasafn Skagfirðinga sem fær 15,6 milljónir í þrjú verkefni. Þriðju hæstu úthlutun hlýtur svo Antikva ehf., 9,2 milljónir, sömuleiðis til þriggja verkefna.
Fram kemur á vef Minjastofnunar að hlutverk Fornminjasjóðs sé að stuðla að varðveislu og rannsóknum á fornminjum.
Þá kemur fram að úthlutað sé styrkjum til eftirfarandi verkefna:
- Fornleifarannsókna (fornleifauppgraftar og fornleifaskráningar)
- Miðlunar upplýsinga um fornminjar
- Varðveislu og viðhalds fornminja, þ.e. fornleifa og forngripa
- Rannsókna á forngripum
„Sjóðnum er jafnframt heimilt að veita styrki til viðhalds annarra menningarminja sem hafa menningarsögulegt, vísindalegt eða listrænt gildi, t.d. minja sem njóta ekki friðunar á grundvelli aldurs en teljast hafa varðveislugildi, svo sem skipa, báta og annarra samgöngutækja,“ segir þar.
Hér má sjá heildarupphæð styrkja:
| Umsækjandi | Styrkupphæð |
| Fornleifastofnun Íslands | 37.400.000 kr. |
| Byggðasafn Skagfirðinga | 15.600.000 kr. |
| Antikva ehf | 9.200.000 kr. |
| Eldstál ehf | 6.000.000 kr. |
| Borgarsögusafn Reykjavíkur | 5.000.000 kr. |
| Háskóli Íslands | 5.000.000 kr. |
| Sagnabrunnur ehf | 3.700.000 kr. |
| Arthur Knut Farestveit | 3.100.000 kr. |
| Hið íslenska fornleifafélag | 2.500.000 kr. |
| Margrét Hallgrímsdóttir | 2.500.000 kr. |
| Lilja Björk Brinks Pálsdóttir | 2.400.000 kr. |
| Ármann Guðmundsson | 1.800.000 kr. |
| Maren Clara von Mallinckrodt | 1.500.000 kr. |
| Minjafélag Vatnsleysustrandarhrepps | 1.000.000 kr. |
| Félag áhugamanna um Bátasafn Breiðafjarðar á Reykhólum | 600.000 kr. |
| Alls: | 97.300.000 kr. |
Nánari útlistun á hverju verkefni er að finna á samantektarblaði Fornminjasjóðs.