Innviðaráðuneytið, undir forystu Eyjólfs Ármannssonar, skorar hæst af ráðuneytum stjórnarráðsins í könnuninni Stofnun ársins 2025. Það ráðuneyti sem skorar lægst er umhverfis-, orku- og loftslagsráðuneyti Jóhanns Páls Jóhannssonar.

Nýjar niðurstöður könnunarinnar Stofnun ársins 2025 sýna hvernig starfsfólk ráðuneyta og annarra ríkisstofnana metur vinnustað sinn. Könnunin er framkvæmd árlega og byggir á svörum tæplega 18.000 starfsmanna hjá ríki, Reykjavíkurborg og sjálfseignarstofnunum. Í ár fór mælingin fram á tímabilinu október til desember 2025 og eru niðurstöðurnar byggðar á vegnu meðaltali níu þátta, þar á meðal stjórnun, starfsanda, launakjörum, vinnuskilyrðum, jafnrétti og ánægju og stolti.

Heildareinkunn hvers vinnustaðar er á kvarðanum 1 til 5 og ræður hún röðun stofnana á listanum. Niðurstöðurnar gefa vísbendingu um innra starfsumhverfi, traust til stjórnenda og líðan starfsfólks og eru jafnframt notaðar sem viðmið í umbótastarfi og mannauðsstjórnun innan opinbera geirans. Þar sem stjórnun vegur þyngst í heildarmatinu gefa einkunnirnar einnig sterka mynd af því hvernig starfsfólk metur stjórnun og skipulag innan stofnana.

Þáttagreining (factor analysis) er notuð til að greina þá undirliggjandi þætti sem eru mældir. Í megindráttum komu fram níu þættir, en þeir eru: stjórnun, starfsandi, launakjör, vinnuskilyrði, sveigjanleiki í vinnu, sjálfstæði í starfi, ímynd, ánægja og stolt og jafnrétti. Vægi þáttanna í heildareinkunn ákvarðast af þáttagreiningunni (sjá mynd 1) en vinnustöðunum er síðan raðað eftir heildareinkunninni.