Framkvæmdastjórn Evrópusambandsins hefur sektaði tískuvörumerkin Gucci, Chloé og Loewe um meira en 157 milljónir evra vegna samráðs um endursöluverð. Upphæðin svarar til rúmlega 22,2 milljarða íslenskra króna.

„Rannsókn framkvæmdastjórnarinnar leiddi í ljós að fyrirtækin þrjú höfðu takmarkað getu sjálfstæðra endurseljenda sem þau vinna með til að ákveða sín eigin smásöluverð, bæði á netinu og í verslunum, fyrir vörur hannaðar og seldar undir vörumerkjum Gucci, Chloé og Loewe,“ segir í tilkynningu framkvæmdastjórnarinnar.

Slík samkeppnishamlandi hegðun er sögð stuðla að hærra vöruverði og draga úr vöruúrvali fyrir neytendur.

Upphaflegar sektarfjárhæðir voru lækkaðar nokkuð í ljósi samstarfsvilja fyrirtækjanna. Sekt Gucci var lækkuð um 50 prósent, í tæpar 119,7 milljónir evra, sekt Chloé um 15 prósent, í tæpar 19,7 milljónir evra, og sekt Loewe um 50 prósent, í rétt rúmar 18 milljónir evra.

Fram kemur að Gucci, Chloé og Loewe séu tískufyrirtæki með höfuðstöðvar í Ítalíu, Frakklandi og Spáni. Þau starfi öll við hönnun, framleiðslu og dreifingu á hágæða tískuvörum, þar á meðal fatnaði, leðurvörum og ýmsum fylgihlutum.

Brot fyrirtækjanna eru sögð hafa náð yfir allt Evrópska efnahagssvæðið (EES).

Sektir sem lagðar voru á fyrirtækin eru sagðar ákvarðaðar samkvæmt leiðbeiningum framkvæmdastjórnarinnar frá 2006 um sektarákvarðanir.

„Við ákvörðun sektanna tók framkvæmdastjórnin tillit til ýmissa þátta, þar á meðal alvarleika og lengdar brotanna, landfræðilegs umfangs þeirra, sem og verðmæti beinnar og óbeinnar sölu viðkomandi vara sem hvert fyrirtæki hafði innan EES á brotatímabilinu.“

Öll fyrirtækin viðurkenndu brot sín og veittu liðsinni við rannsókn evrópsku samkeppnisyfirvaldanna.